جەماوەرێکی وەزاڵەهاتوو
دەسەڵاتێکی درندە و هەوسارپساو
مێژوویەک بۆ ئەزموون وەرگرتن
بەرچاو روونی بۆ خەباتی داهاتوو
ن: عومەر ئیلخانی زادە
٢٢ی رێبەندان بکەینە ئەزموون
گەلێک گرینگە لە بارودۆخێکدا کە خەڵکی ئێران لەگەڵ دەسەڵاتێکی درندە و هەوسارپساو و تێکدەر لە بەربەرەکانێ و ململانێ دان، ئەزموونەکانی رابردوو بخەینەوە بەرچاو
نەفرەت و بێزاریی رەوای جەماوەری خەڵک لە دەسەڵاتی پاشایەتی و سەرکوت و داپڵۆسینی سیاسی، خۆڵقێنەری شۆرش و راپەرینی ١٣٥٧ بوو. خوولیا و ئارەزووی خەڵک، دێموکراسی و رزگار بوون لە چەوسانەوە و سەرکووت بوو، بەڵام بە پێچەوانە رژیمێکی درەندەتر و سەرکوتگەر وچەوسێنەرتر دەسەڵاتی گرتە دەست. بەڵام هەر وەک چلۆن رەوایی و ئامانجی خەڵک لە بەربەرەکانێ و خەبات لە دژی دەسەڵاتی پێشوو بە مانای رەوایی دان و خواستی هاتنە سەرکاری ئەم حکوومەتە نییە، بەڵام ئەوەش راستییەکی حاشاهەڵنەگرە کە هەرگیز بە مانای خۆزگەخواستن و پەسندی دەسەڵاتی پێشوو نییە وبە دڵنیاییەو واش نییە. بە دەرس و ئەزموون وەرگرتن لە رێبەندانی ١٣٥٧،ملنەدان و راپەرین لە دژی ئەو دەسەڵاتە پێویستییەکی ئینسانی،نەتەوەیی و ئازادیخوازانەیە
هەڵبەتە بەر لە هەموو شتێک لە بیرمان نەچێ کە نەک هەرگیز نابێ هەموو لایەنەکانی راپەرینی ئەو کات لەدژی دەسەڵاتی پەهلەوی پیرۆز بکەین،بەڵکوو بۆ بەرچاو روونی و وشیاری زیاترمان لە خەبات و شۆرشی داهاتوودا و،بۆ ئەوەیکە تەنیا بە هۆکاری نەفرەت و بێزاریی رەوامان لەو رژیمە ملکەچی هەموو ئاڵترناتیڤ و جێگرەوەیەک نەبین،یان چلۆن ببینە بەربەست لەبەر دەم خۆ زەقکردنەوەی ئاڵترناتیڤە نادێمۆکرات و دژە خەڵکییەکان، پێویستە بڤە و تابۆی شرۆڤە و لێکدانەوە و هەڵسەنگاندنی لایەنی پاوانخواز و کۆنەپەرستانەی نێو ئەو راپەرینە بشکێنین
بەڵام چلۆن
وەڵامی سەرەکی و گرینگ، تەنیا پێداگری و مکوور بوونە لەسەر داواکارییە عادڵانە و دێمۆکراتیکەکان. بە لەبەرچاوگرتنی بەرەنگاری و وەستانەوە و بێ متمانەیی جەماوەر بەرامبەر بە باڵەکانی دەسەڵات ،پێویستە هەر لە ئێستاوە بە بەرجەستەکردنی ئەم خواست و داواکارییانە، بیانکەینە دروشم و داخوازیی سەرەکیی جەماوەری خەڵک
لێرەدایە کە پێویستە هەڵسووراوان و چالاکانی سیاسی ویست و داخوازیی رۆژانەی خەڵک ئاوێتەی رێکار و شێوازی روون و تۆکمەی خەباتکارانە بکەن و ببنە پێشەنگی جووڵانەوەی جەماوەری و،بە بەردەوامی ئەزموونەکانی رابردوو بخەنەوە بەر چاوی جەماوەر
ئێمە لە قۆناغێکی هەستیاری مێژوویی داین. رۆژانە دەبینین و دەبیستین کە دۆراو و ریسوا و روورەشەکانی رابردوو، ئەمرۆ لەژێر ناوی سێکۆلاریزم و تەنانەت لەژێر ناوی بیروبۆچوونی جۆراجۆری ئایینیدا تێدەکۆشن سواری شەپۆلی بزووتنەوەی جەماوەری بن و بەسەریدا زاڵ بن، لە کاتێکدا کە ئەمرۆکە ئازادی و سەربەستی،ژیانێکی باشتر و شیاوی ئینسان،نەمانی هەڵاواردن و سەرکووت و داپڵۆسین،تەناهی و ئاسوودەیی و حەسانەوە بۆ رەخساندنی بەستێنی پێکەوەژیان و بوونیادنانەوە و گەشەسەندن داخوازی سەرەکی جەماوەری خەڵکە،زۆر پێویست و گرینگە کە ئەم ئاوات و خواستە جەماوەرییانە بکەینە هەوێن و بەستێنی یەکێتی و یەکگرتوویی و هاودەنگیمان
