1 دقیقه خواندن
25 Nov
25Nov

سەردانی هەیئەتێکی کۆنگرەی نەتەوەیی کوردستان(کەنەکە) لە ناوەندی سەرکردایەتی کۆمەڵە



سەرلەبەیانی رۆژی دووشەممە ٣ی مانگی سەرماوەزی ١٣٩٩ی هەتاوی رێکەوتی ٢٣ی مانگی نوامبری ٢٠٢٠ی زایینی، هەیئەتێکی کۆنگرەی نەتەوەیی کوردستان بە سەرۆکایەتی بەرێز ئەحمەد قەرەمووس هاوسەرۆکی کەنەکە و هاورێیەتی بەرێزان ئاسیە عەبدووڵڵا ،مەروا حەسەن، زەینەب عەلی و یۆسف حەسەن سەردانی ناوەندی سەرکردایەتی کۆمەڵەیان کرد و لە لایەن هەیئەتێکی کۆمەڵە بریتی له هاوڕێیان رەزا کەعبی دەبیری هەیئەتی ئیجرایی، عەتا ناسرسەقزی ئەندامی هەیئەتی ئیجرای، چیمەن جەوانروودی ئەندامی کۆمیسیۆنی رێکخستنی نهێنی و ئارام مودەریسی بەرپرسی سکرتاریەتی کۆمەڵەوە بە گەرمی پێشوازییان لێکرا. لەو دیدارەدا کە تەوەر و ئەجیندا سەرەکییەکەی بارودۆخی گەلی کورد لە گۆرانکارییەکانی ناوچەکە و پێوەندی نێوان هێز و لایەنە سیاسیە کوردستانییەکان بوو، وێرای پێداگری لەسەر پێویستی و گرینگی پێوەندی و هاوکاری و هاوگوتاریی هێزە سیاسیەکانی هەرچوار پارچەی کوردستان، هەیئەتی میوان داوایان لە کۆمەڵەی زەحمەتکێشانی کوردستان کرد لە پێناو ئاساییکردنەوە و دامرکاندنەوەی گرژییەکانی ئێستای نێوان هێز و لایەنە کوردییەکان هەموو هەوڵەکانی خۆی بخاتەگەر. لە بەرامبەردا هاورێ رەزای کەعبی له لایەن هەیئەتی کۆمەڵە وێرای قسەوباسێکی تێروتەسەل و بە پشت بەستن بە بەڵگە و نموونە مێژوویەکان لەسەر گرینگی هاوگوتاری و هاوخەباتی هێز و لایەنە کوردییەکان پێداگری کرد و وێرای جەختکردنەوە لەسەر تایبەتمەندی و شێوازی جۆراوجۆری خەبات لەهەر بەشێکی کوردستان، روانگەی کۆمەڵەی لەبابەت گرینگیدانی کۆمەڵە بە پرۆسەی هاوکاری و هەوڵەکانی بۆ یەکخستنی گوتاری هاوبەشی نەتەوەیی لە نێوان هێزە سیاسیەکانی کورد بە گشتی کرد و وێرای ئاماژە بە پێویستی هەنووکەیی پشتگیری و پاراستنی یەکریزی کوردستانی و لەگەڵ قامک خستنەسەر مەترسی و هەرەشەکانی داگیرکەران بۆسەر کۆی بزاڤی رزگاریخوازی گەلی کورد لە ناوچەکە و لە پێناو قۆستنەوەی ئەگەر و دەرفەتەکانی بەردەم چارەسەری کێشەی مێژووی گەلی کورد، لە پێناو وەگەرخستنی هەر هەوڵێک بۆ نەهێشتنی گرژی و ئاڵۆزی نێوان حیزب ولایەنە کوردییەکان و بۆ دەستەبەرکردنی کۆدەنگی و هاوکاری نێوان لایەنەکان ئامادەیی خۆی دەربری.
سکرتاریەتی کۆمەڵەی زەحمەتکێشانی کوردستان
٣ی سەرماوەزی ١٣٩٩ی هەتاوی ٢٣ی نوامبری ٢٠٢٠ی زایینی